ஜூராசிக் வேர்ல்ட் திரை விமர்சனம்

பெரும் எதிர்பார்ப்புகளைக் கிளப்பிய படம். ஆனால் ட்ரைலர் என்னை ஈர்க்கவில்லை. அதே கிளிஷே காட்சிகள், அலறல்கள், அதே தப்பிப் பிழைத்தல் ட்ரைலர் பார்த்தவுடனேயே கதை புரிந்துவிட்டதால் படம் குறித்த அதீத எதிர்பார்ப்புகள் என்னிடம் இல்லை. 

படத்தில் நான் எதிர்பாராத ஒருவிசயம் இர்பான் கான், ஒரு இந்திய நடிகர்! ஏற்கனவே இவரை லைப் ஆப் பை படத்தில் பார்த்திருந்தாலும் ஒரு மெகா பட்ஜெட் படத்தில் இவரை பார்த்தது ஆச்சர்யம். நம்ம ஆட்கள் எங்கேயோ போய்க்கொண்டு இருக்கிறார்கள் என்கிற மகிழ்ச்சி. 

ஜூராசிக் பார்க்கை பார்க்க வரும் கூட்டத்தை ஈர்க்க புதிது புதிதாக ஹைபிரிட் டைனோசர்களை உருவாக்குகிறார்கள். இப்படி உருவாகிறது இண்டோமினஸ் ரெக்ஸ். 

உண்மையில் இது விலங்குகளின் ஜீன்களை எடுத்து மேலும் பல டைனோக்களின் டி.என்.ஏக்களுடன் ஓர் காக்டெயில்லாக கலக்கப்பட்டு உருவாக்கப்பட்டது. 

திட்டம் போட்டுத் தப்புவது, ஜாலிக்கு மற்ற டைனோக்களை கொலைசெய்வது, தன்னைக் கொல்ல வரும் ராப்டர்களை மனிதர்கள் மீது ஏவுவது என செமையான வேலைகளை செய்கிறது இது படத்தினை அசுர வேகத்தில் நகர்த்துவது இந்த டைனோதான்! 

படத்தின் ஹீரோ கிரிஸ் பிராட்! (முந்தய பிளாக் பஸ்டர் கார்டியன்ஸ் ஆப் த காலக்சி) கடந்த பாகங்களில் பார்வையாளர்களை மிரட்டிய ராப்டர் வகை டைனோக்களை  இவர் செல்ல நாய்க்குட்டிகள் மாதிரி பழக்கிவைத்திருக்கிறார். சக்தி வாய்ந்த அழிவு எந்திரங்களான இவற்றை ராணுவத்தில் பயன்படுத்த விரும்புகிறான் வில்லன்! 

டோரா போரா மலையில் மட்டும் இவை கிடைத்திருந்தால் எப்படி இருந்திருக்கும் என்று சிலாக்கிறான் அவன்! 

பெரும்பாலான அமெரிக்கர்களுக்கே இந்த  வசனம் பிடிக்காது என்றே நினைக்கிறேன். பார்ப்போம். 

பல ஆ ஊ அலறல்களுக்குபின்னர் படம் சுபம். 

படத்தின் இசை தொழில் நுட்பம் என பல விசயங்கள் வழக்கம்போலவே அசத்தல். காலின் ட்ரீவோரோவிடம் இயக்கத்தை கொடுத்துவிட்டு ஸ்டீவன் ஸ்பீல்பெர்க் தயாரிப்போடு நின்றுகொண்டுவிட்டார். 

படத்தில் வரும் கண்ணாடி மோனோ ரயில், கைரோஸ்பியர் என்ற வாகனம் எல்லாம் அசத்தல். படத்தில் ஹீரோ செலுத்தும் டிரயம்ப் பைக் நம்ம பசங்களின் விஷ் லிஸ்டில் இருக்கும்!

ட்ரைலர் தந்த ஏமாற்றத்தை படம் தரவில்லை. அருகில் அமர்ந்திருந்த நிறையப்பேர் ஆழ்ந்துபோய் ரசித்தார்கள். நம்ம ரசிகர்கள் படத்தை ஒரு மெகா ஹிட்டாக்கி விடுவார்கள் என்று தோன்றுகிறது. 

நிச்சயமாக ஒன் பில்லியன் வசூல் செய்யும். 

பார்த்து சலித்த காட்சிகள் என்றாலும் மீண்டும் ஒருமுறை பார்க்கவைக்கும்படி வந்திருக்கிறது படம்.