நுட்பம் நாம் எட்ட வேண்டிய தொலைவு

எனது நண்பர் ஒருவர் கட்செவியில் ஒரு காணொளியை அனுப்பி வைக்க அதை மாணவர்களிடம் பகிர்ந்தேன் நான். கட்டிடப் பொறியியல் நுட்பத்தில் நாம் செல்ல வேண்டிய தூரம் இன்னும் எவ்வளவு இருக்கிறது என்று ஏங்க வைத்த காணொளி.



சீனாக்காரர்கள் தரமற்ற பொருட்களை சந்தைப்படுத்துகிறார்கள் என்கிற குற்றச் சாட்டு உண்டு.  ஆனால் அவர்களின் நாட்டில் அவர்கள் பயன்படுத்தும் கட்டிடப் பொறியியல்  நுட்பங்கள் இரண்டாம் தரம் அல்ல.

சீனாக்காரர்கள் இப்படி என்றால் தங்களின் எண்ணைவளத்தைக் கொண்டு வானைச் சுரண்டும் கட்டிடங்களை எழுப்பும் துபாய் இன்னொருபக்கம் நமக்கு பழிப்புக் காட்டுகிறது.

உலகின் மிக உயரமான கட்டிடமான புர்ஜ் காலிபா கோபுரத்தின் மீது அமைக்கப்  பட்ட ஒரு கிரேனின் உச்சியில் இருக்கும் அதன் இயக்கும் பொறியாளருடன் ஒரு படம் வந்தது.

கீழே இந்தச்   செய்தியுடன்.

உலகின் உயர்ந்த கட்டிடத்தின் மீது இருக்கும் கிரேனை இயக்குபவர் நம்ம சென்னையிலிருந்து வந்த பாபு! என்றது அந்த செய்தி. நம் மனித ஆற்றல்கள் இப்படி உலகின் பெரும்பாலான கட்டிடங்களோடு நம்மவர்கள் தொடர்போடு இருப்பது மகிழ்வே என்றாலும், இவர்களின் அத்துணை ஆற்றலையும் உள்நாட்டில் செயல்படுத்த ஒரு தலைவன் வரவேண்டும் என்பது பேராசை அல்லவே.

நமக்கு என்ன குறை,

சொத்து குவிப்பில் மட்டுமே கவனம் செலுத்தும் அரசியல் தலைமைகள்தான் காரணம் என்று சொல்லிவிட முடியாது. நமது மௌனம் அவர்களின் கொள்ளை அடிக்கும் உரிமம் என்பதை நாம் எப்போது உணர்கிறோமோ அதுவரை இந்த வியாதி நீடிக்கும்.

நல்ல கூர்நோக்குள்ள அரசியல் தலைமைகள் வரட்டும்.